Bakhaw Festival sa Del Carmen saulogon

Gipangandaman sa mga opisyal sa lungsod sa Del Carmen ang dakong kalihukan karong Martes ug Meyerkulis, Hulyo 15-16, 2008 isip pagsaulog sa ilang ika 373 nga kapistahan.

Kini ang gibutyag ni Del Carmen Mayor Constantino Bully Navarro IV. Matod niya nga ilang hugot nga gipangandaman ang kapistahan sa lungsod gumikan kay daghan bisitang dinapit ang motambong nga gikan sa lain-laing dapit.

Isip League of Municipality of the Philippines Surigao del Norte Chapter President, iyang giimbita si LMP National Executive Director Lilian de Leon ug DENR assistant secretary Gerry Calderon.

Gikatakda usab nga mobisita sila si Surigao del Norte 1st District Congressman Francisco Lalo Matugas ug Surigao del Norte Governor Robert Ace Barbers.

Matod niya mobisita usab ang iyang pinalanggang inahan nga mao si Josie Bernardo uban sa iyang pamilya.

Siya nagpasalamat sa iyang mga lungsoranon tungod kay namentenar niini ang kahinlo ug pagkamalinawon sa ilang lungsod.

Tinguha ni Mayor Navarro na mailhan pa ang Del Carmen sa natad sa turismo tungod sa mga naghambin nga mga tourist spots sa maong lungsod.

Nunot niini giimbetar niya ang mga silingan lungsod na mosaksi sa ilang Bakhaw Festival 2008 karon Meyerkulis sa ala una ang takna sa hapon nga ipahigayon sa lungsod sa Del Carmen.

Ang kabakhawan sa maong lungsod nailhan nga usa sa labing dako nga kabakhawan sa Asya. Kini ang gitagaan og pagtagad ni Mayor Navarro pinaagi sa pagpalambo sa kinaiyahan – ang kabakhawan dako ang natabang sa kinaiyahan tungod kay nagsilbi kini tiglimpyo sa mga hugaw nga moadto sa kadagatan. Dugang niini nagsilbi pod kining bakhaw nga balay sa mga buntis nga isda ug labi na sa mga gagmay nga isda. (Super Banat Balita/PIA-Caraga)

Share: