Gov. Barbers ug Cong. Romarate parihong mihatag og P2.5 milyones

Pulos mihatag og 2.5 milyones ang gobernador sa Surigao del Norte ug ang kongresista sa ikaduhang distrito sa Surigao del Norte alang na sa buhatan sa polis sa syudad sa Surigao.

Matod sa sulat gikan sa buhatan ni kongresista Guillermo Romarate, pinitsahan niadtong bulan sa Marso ning tuiga nga gipahibalo na ang buhatan sa mayor sa dakbayan sa Surigao nga adunay dugang pundo nga gigahin sa kongresista.

Matod pa ang maong headquarter nga anha pagatukoron sa Barangay Washington sakop sa dakbayan sa Surigao.

Mipahibalo ang kongresista sa mayor sa dakbayan nga taposon ang maong proyekto.

Samtang si Surigao del Norte Governor Robert Ace Barbers mipahibalo usab nga aduna siyay gigahin nga 2.5 milyon aron matapos ang maong proyekto.

Si Barbers mitataw nga nahatag nasad ang maong kantidad ngadto ni Surigao City Mayor Alfonso Casurra bag-ohay pa lamang.

"Kay ako man jaon (kana) nagsugod nga proyekto sa kongressman pa ako, nagsulti man ako nga ang tanan nako nasugdan akong humanon," matod ni Barbers.

Matod ni Barbers nga kon matapos ang maong edepisyo aduna siyay dugang paliton nga mga kahimanan susama sa computers, aircons, lamesa, lingkuranan ug uban pa.

Iyang giklaro nga sakto kaayo nga mihatag ang kongresista aron mapalit ang mga dugang kahimanan sa awtoridad.

"Jaoy may (adunay) mga tawo na gusto motapos sa atong mga nasugdan nga proyekto pero kita mapasalamaton gihapon sa ilang tinguha kay sayod man ang katawhan kun diin jaon na (kana nga) pundo gikan," matod sa gobernador. (Super Banat)

Share: