"Kamo mga katawhan ang tigbalantay" – opisyal sa military

Gipasabot ni Captain Nolie Canashiro, ang Civil Military Operations sa Philippine Army nga kinahanglan ang mga katawhan makig-alayon sa mga awtoridad aron mapakgang ang mga dautang plano sa mga rebelde.

Kini iyang gibutyag atol sa malampuson nga gipahigayon nga dakung pulong-pulong didto sa lungsod sa Dapa niadtong Lunes sa buntag didto mismo sa Municipal Ground. Gitambongan kini sa mga dagkong opisyales sa kasundalohan, kapolisan ug 29 ka mga kapitan ug mga opisyales sa lain-laing barangay sakop sa Dapa ug mga kawani ug mga opisyal sa nahisgotang lungsod pinangulohan ni Mayor Peter Boy Ruaya.

Gitumbok ni Canashiro nga ang katawhan makig tambayayong usab sa mga awtoridad o pagkooperar pinaagi sa pagreport ngadto kanila kun aduna may ugaling ilang nahibal-an particular na kun aduna sila'y makit-an nga mga armadong tawo ug kadudahan ang mga linihukan.

Dugang pamahayag ni Canashiro nga dili sila magduha-duha sa pag text sa hotline 0919-6525939.

Matod ni Canashiro nga ang katawhan maoy mas epektibo sa intelligence gathering tungod kay sila ang dali makakita sa mga rebelde nga anaa sa ilang palibot.

Siya mipasabot nga dili angay nga suportahan sa katawhan ang mga rebelding NPA aron dili moabot ang panahon nga magubot ang lungsod sa Dapa ug uban dapit sa Siargao Islands.

"Kini ang lugar nga gihatag sa atong mga katigulangan nga gibilin kanato, so dapat nato kining ampingan," matod niya.

Siya nanawagan nga supportahan ang kapolisan ug kasundalohan aron sa pagkunhod sa insurhensya.

Kon mahinumdoman matapos giataki ang duha ka lungsod sa Dapa ug General Luna sa isla sa Siargao, ang mga rebeldeng komunista nagbilin og mga propaganda ug usa niini naghisgot sa Oplan Bantay Laya II (OBL II).

Matod sa gipagawas nga press release sa tigpamaba sa Northeastern Mindanao Region Communist Party of the Philippines – New People's Army – National Democratic Front (CPP-NPA-NDF) nga si Ka Maria Malaya nga ang Oplan Bantay Laya II usa ka bangis og terrorista kampanya nga nagtumong tapuson ang rebolusyonaryong pwersa sa tuig 2010.

Apan sukwahi ang pagpasabot ni Capt. Nolie Canashiro tungod kay matod niya nga ang Oplan Bantay Laya II usa ka baruganan sa military nga magbuntog sa ensurhensya sa tuig 2010.

"Ngano mahadlok man sila sa Oplan Bantay Laya? Tungod kay ang Bantay Laya naay plano nga ang katawhan, ang local nga panggamhanan, military ug polis maghiusa aron labanan ang communist-terrorist," matod ni Canashiro.

Dugang pasabot ni Canashiro nga mapukan ang ensurhensya dili sa pamaagi sa armadong pakiglaban kun dili pinaagi sa panagtambayayong sa mga katawhan, kapolisan ug kasundalohan aron tapuson na ang giyera.

"Hangtud dili nato maabot pagbuntog ang ensurhensya sa tuig 2010, dili nato matagamtam ang mga developmental projects. Instead ipalit og bala sa kanyon ug bala sa armalayt, ipalit nalang nato og kabilya ug sementohon ang mga kalsada, ihimo ug mga eskwelahan ug uban pa…So mao kini ang tumong sa Bantay Laya nga walaon ang giyera kay aron pagkatapos ani mao ang kalambuan," asoy ni Canashiro. (Super Banat Balita/PIA-Caraga)

Share: