Surigao giduso sa Kongreso isip highly urbanized city

Butuan City (21 July) -- Plano nga pag highly urbanized city sa Surigao ang wala pa mahimo og balaodnon sa kongreso. Kini ang gibutyag ni Surigao del Norte 2nd District Congressman Guillermo Romarate Jr., niadtong nakalabay nga semana.

Iyang giklaro human migawas ang report sa radyo gikan sa usa ka radio blocktimer nga iya na daw gihimoan og balaodnon. Dugang pa sa maong report, dili pa lang dugay nga iya na daw giduso ang maong balaodnon ngadto sa kongreso.

Matod sa kongresista nga walay kamatuoran ang report.

Hinuon positibo ang kongresista nga sa umaabot nga panahon basin kini maconvert ra ang syudad sa Surigao ngadto pagka highly urbanized city.

"Akong gitan-aw ang tulo ka mga requirements pinasikad sa Local Government Code of 1991. Una, ang income sa syudad; ikaduha, ang population ug ikatulo ang land area," matod ni Romarate sa usa ka interbyu.

Gibutyag niya nga ang una ug ikatulo nga requirements pinasikad sa Local Government Code of 1991, nga mao ang income ug land area ang pulos kwalipikado sa syudad sa Surigao. Apan ang ikaduha, sa pagkakaron ang 'dili pa gyud ma-qualify' tungod kay wala pa mokabat og 200 mil kalibo ka mga tawo ang nanimuyo sulod sa syudad sa Surigao.

"I inquired the National Statistics Office and they gave me the data which stated that as of August 2007, Surigao City has a total of 132,000 population more or less," matod sa kongresista.

Matod sa kongresista nga dako kaayo ang iyang pasalamat ngadto kang Surigao City Mayor Alfonso Cassura kinsa dako ang paningkamot aron mapalambo ang syudad sa Surigao.

"It is a matter of time, may be one of these days makaabot ra gyud ta ana so that's the time to make a bill to convert the city of Surigao into a highly urbanized city," dugang taho ni Romarate. (Super Banat Balita/PIA-Caraga)

Share: