DILG nagpahigayon ug orientation sa local management procedures para LGUs

Niadtong Agosto 20, si Gov. Robert Ace Barbers mitambong sa gipahigayon nga orientation/forum sa updated Local Planning Investment Programming, Revenue Administration, Budgeting & Accounting Procedures for LGUs nga gipasiugda sa DILG sa Provincial Convention Center.

Ang batan-ong Gobernador Ace Barbers mipadayag sa iyang dakong pasalamat sa maong okasyon, diin makakat-on sa mga bag-ong pamaagi sa mga nahisgutang topiko ang tanang mga lumilihok sa mga local nga pangagamhanan, labi na ang mga MPDC's (Municipal Planning Development Coordinators) sa tibuok probinsya, aron usab sa pagkab-ot sa mas maayong sistema sa pagplano sa mga nagkadaiyang programa pinaagi sa "rationalizes planning".

Sa laing bahin, sa susamang adlaw, malampuson usab nga gipahigayon ang overview sa bag-o nga Bioreactor didto sa Administrator's Conference Room, diin gitambongan kini sa atong Provincial Administrator Adolfo Pantilo, Sr., DOST Chief Microbiology & Genetics Division, Engr. Gumapac ug PEMO Chief Antonieto Charcos.

Nagkanayon si Engr. Cabacang, nga dili unta masagulan ug kolor sa pulitika ang maong proyekto aron sa pagsiguro nga magmakanunayon ang maong programa, labi na nga dako ang tabang niini sa atong pagdumala sa atong mga basura aron maampingan ug maprotektahan ang atong kinaiyahan.

Sa dugang kalamboan, gipahigayon usab karong adlawa (Agosto 21) ang pinakauna nga Gov. Ace Barbers Dragon Boat Friendship Games Orientation Seminar sa tanang interesadong musalmot sa sports event. Dako ang kalipay ni Gov. Ace Barbers sa ubay-ubay ngaa misuporta ug nagpakita sa ilang interes sa maong kalihokan nga gipasiugdahan sa Philippine Dragon Boat Federation.

Buot sa batan-ong gobernador nga mailhan usab ang probinsya sa Surigao del Norte dili lamang sa surfing, kundi usab usa sa Adventure Tourism destination sa Asya.

Ang maong kalihokan giabagan usab sa Provincial Tourism Office diin natapos kini niadtong Agosto 22, 2008. (Media Affairs Office)

Share: