Cebuano News : Gov. Ace Barbers mipahigayon ug usa ka Public Consultative Meeting uban sa mga Mamanwa

Matalandugon nga ghimo ni Gob. Ace Barbers ang usa ka Public Consultative Meeting sa mga Mamanwa kagahapong adlawa, Nov. 26, 2008, sa PPDO Conference Room sa kapitolyo.

Ang mga nagkalain-laing tribu sa mga Mamanwa sa tibuok probinsya natigum kay buot sa maalagarong Gobernador Barbers nga mapadayag nila ang ilang tanang mga mulo ug mga problema sa tagsa-tagsa nila ka katilingban.

“Angay masayran sa atong mga igsoon nga mga Mamanwa, nga sa akong administrasyon karon anaay dako nga panlantaw, pagtagad ug pagpakabana sa ilang kahimtang karon pinaagi niining atong public consultative meeting. Uban ang ilang mga lideres, dinhi atong matubag ug masolusyunan ang inyong mga gihambin nga mga problema sa dugay na napanahon, ug pinaagi niini nga ato gayud makab-ot ang tinuuray nga kalamboan sa atong mga kaigsuonang Mamanwa,” nagkanayon si Gob. Ace Barbers.

Madasigon nga nagpadayag ang mga nagkadaiyang mga miyembro sa tribu sa ilang mga problema labi na sa ilang “Ancestral Domain” nga ilang katungod nga gikuha gikan kanila. Ug usab ang pagtuman sa mga balaodnon nga subay sa ilang tradisyon ug kultura.

Nagmabungahon ang maong tigum diin napadayag usab ni Gob. Ace Barbers ang pagtinabangay tali na sa pangagamhanan ug mga mamanwa diin dako ug tabang ang mamahimo sa mga IP’s sa pag-amping ug pag protiher sa kinaiyahan nga maoy adbokasiya karon sa probinsya, labi na ang pagpresirbar sa mga mga endangered species sama sa mga Tarsier ug Sea Eagle ug mga tanum nga diri lamang makita sa atong probinsya.

Uban sa maong tigum mao usab ang Regional Director sa NCIP, Atty. Jake Dumagan, IFAD Director Menor ug Fr. Lolong Ramada sa Diocese sa Surigao del Norte.

Tungod sa dakong kadasig nga nakita ni Gob. Ace Barbers, siya mipahibalo nga pagahimuon na niya ang maong Public Consultative Meeting sa mga Indigenous People matag “Quarter”, ug kini gikalipay gayud sa tanang mga mingsalmot sa maong tigum. (PGO-Media Bureau)

Share: