Programa sa Gobernador gisuportahan sa nagkadaiyang ahensya; "Clean Up Our Coasts… Clean Up Surigao" ilusad

Sa malampusong mga programa ni Gob. Ace Barbers sa pagprotiher sa atong kinaiyahan, ubay-ubay karon nga mga nagkadaiyang mga ahensya nga mipakita sa ilang kadasig ug pagsuporta sa maong dalaygon nga programa, ug gani gisundan kini karon sa paglusad sa Clean Up Our Coasts… Clean Up Surigao karong umaabot nga Nobyembre 15, 2008.

Ang maong kalihukan pamunuan sa Provincial Environment Management Office uban sa pagatambayayong sa PNP- Provincial Office uban sa koordinasyon sa City Government, DENR, Philippine Ports Authority, Philippine Coast Guard, Bureau of Customs, MARINA ug ang KACOSA o Kapit-Bisig Community Service Association.

Ang pagpanglimpyo sa coastal areas sa dakbayan sa Surigao molakip sa Boulevard ngadto sa Bilang-Bilang sa karon nga bulan sa Nobyembre, gipaningkamutan ug gitinguha sa mga mingsalmot sa maong kalihukan nga mahimo na kini nga "regular activity" aron mamintinar gayud ang kalimpyo sa tanang lugar labi na gayud ang atong mga kadagatan.

Dako ang kadasig ug kalipay ni Gov. Ace Barbers sa maong kalamboan diin iyang nalantaw nga pinaagi sa maong programa ang tanang mga Surigaonon magkahiusa ug mamahimo na usab ang lalawigan nga modelo sa ubang mga probinsya sa tibuok nasud labi na gayud sa atong pagpangga ug pag-amuma sa atong kinaiyahan. (PGO-Media Bureau)

Share: