Gob. Ace Barbers hugtanong nag-awhag sa hugot nga pagpatuman sa maayong panglawas; PHO mipahigayon sa ilang mga nagkadaiyang health services sa tibuok

Agig pagsanong sa awhag ni Gob. Ace Barbers sa hugtanong pagpatuman sa mga programa sa maayong panglawas, Provincial Health Office nagpadayon sa paghatag ug way puas nga de kalidad nga panirbisyo sa mga katawhan aron ang tanan maprotektahan ug layo sa mga sakit.

Sa milabayng semana, sila mipahigayon sa Mass Urine Screening for Elementary School children ug ang Fasting/Random Blood Sugar determination para sa tanang ginikanan ug mga magtutudlo didto sa duha ka tulungha-an sa Tubod, nga mao ang M.A. Dapar Elem. School, Cawilan ug Calang Custodio Elementary School Del Rosario.

Ang mga volunteer ug mga medical practitioner nga nanguna sa maong kalihukan, malipayon nga mibutyag nga sila adunay halos 420 ka pasyente nga gi atender ug gitambalan sa maong mga tulungha-an. Sa mga estudyanteng nahibaw-an nga adunay abnormal nga pagpangihi ug mga ginikanan ug magtutudlo nga tag-as ug blood pressure, sila dayon gidapatan sa maong mga tambal nga angay kanila.

Ang maong Mass Urine Screening ug Random Blood Sugar Determination usa ka joint activity sa Provincial Health Office ug Surigao del Norte Coalition for REDCOP. Sa milabay usab nga Bloodletting Activity niadtong Pebrero 6, 2009, adunay 25 ka mga donors ang nakuha gikan sa mga empleyado sa Kapitolyo.

Dako ang kalipay ug pasalamat ni Gob. Ace Barbers sa mga nanguna sa maong kalihukan nga naghatag ug tinuoray nga pagpanirbisyo. Siya midugang nga tungod sa ilang kakugi ug pagtinambayayungay, ang pangagamhanan sa probinsya nagmalampuson ug nagpabilin nga tinubdan sa paglaum sa mga katawhan ug kini namahimong inspirasyon sa tanan. (SdN PGO-Media Bureau)

Share: