Tungod sa dakong suporta ni Gob. Ace Barbers, ubay-ubayng mapuslanong mga programa sa Provincial Veterinary Office para sa tuig 2009 ipatuman

Dako ang kadasig ug suporta ang gipakita ni Gob. Ace Barbers sa mga programa nga ipatuman sa Provincial Veterinary Office para sa tuig 2009 agig pagtabang ug paghatag dugang panginabuhi-an sa pipila ka mga mag-uuma sa probinsya. Malampusong gipahigayon ang ilang Municipal Agricultutal Officers/Municipal Agriculturists and Agricultural Technicians Livestock Meeting sa milabayng Pebrero 04, 2009, didto sa Jakelou Function Room sa Narciso St. ning atong siyudad.

Sa maong tigum, gituki sa pipila ka mga municipal agriculturists ang mga programa ug proyekto nga kinahanglan nga i prayoridad, diin ang mga programa sa Animal Health Protection Program, Animal Production Program, Institutional Development nga naglangkob na sa Strenghthening Livestock and Poultry Raisers, ug ang regular nga pagpahigayon sa ilang meeting matag quarter, ug usab ang mga special programs sama sa pag mintinar sa Provincial Breeding Center sa Magpayang ug Mainit ug Jubgan Stock Farm sa Jubgan ug San Francisco, Surigao del Norte maoy hatagan ug gibug-aton.

Gidugang pa nga agig pagpangandam sa pagsaulog sa Livestock Farmer’s Week karong umaabot nga katapusan sa Abril, sila mopahigayon sa Search for Outstanding Brgy./Municipality LAPRA, Swine Raiser, Small Ruminant Raiser, Large Animal Raiser, Kabir/Duck Raiser ug Meat Processing sa tibuok probinsya.

Ang Provincial Veterinary Office, hugtanong mipatuman sa mga nagkadaiyang programa ubos sa liderato ni Gob. Ace Barbers diin ubay-ubay na sa mga mag-uuma ang nakaangkon sa dakong tabang niining sa ilang panginabuhian, Ubos sa maong programa, sila nagdugang pag awhag sa uban pang gusto mopatigayon sa pagbuhi ug mga kahayupan.

Si Gob. Ace Barbers nagkanayon nga andam kanunay siya sa paghatag ug hugot nga suporta tungod tumong ug tinguha sa iyang administrasyon ang paghatag ug tiunay nga tabang sa mga mag-uuma aron madungagan pa ang pagpalambo sa natad sa agikultura sa probinsya. (SdN PGO-Media Bureau)

Share: