Presidente Arroyo ug 30 ka Kongresista kauban ang Ambassador sa Canada, Italy ug uban pa mubisita sa ipahigayon nga game fishing tournament

Nalipay ug daku si Kongresista Francisco ‘Lalo’ Matugas sa iyang pagkuyog-kuyog kay Presidente Gloria Macapagal-Arroyo sa gawas nasud kauban niya ang mga kongresista sa mga nagkalain-laing probinsya sa nasud ug mga miyembro sa gabinete.

Matud pa sa Kongresista matag abot nila sa laing nasud mismo si PGMA ang mighangyo sa mga Ambassadors nga mobisita sa isla sa Siargao aron sa pagsaksi sa ika-duha nga ipahigayon nga game fishing tournament karong umaabot nga bulan sa Mayo 7-9 sa lungsod sa Pilar karong tuiga.

Gidugang pa sa kongresista karong Marso 4 magsugod na sa paglanding ang eroplano sa isla sa Siargao ug magpadayon na kini sa isla sa Siargao paingon sa Manila.

Padayon usab nga gitrabaho ang Sayak Airport sa lungsod sa Del Carmen pinaagi sa pagtukod ug terminal airport aron maanindot tan-awon sa mga bisita unya atol sa paglanding sa depasaherong eroplano.

Daku nga pasalamat ni Kongresista Lalo Matugas ngadto kay Presidente Gloria Macapagal-Arroyo tungod sa walay puas nga suporta sa isla sa Siargao pinaagi sa paghatag ug dakung pundo hilabina sa pagsuporta sa kalambuan sa turismo sa iyang pag-imbitar sa mga Ambassadors sa gawas sa nasud. (Surigao Balita)

Share: