Oplan Kwaresma, padayong gipatuman sa PNP Caraga

Padayong gipatuman ang Oplan Kwaresma sa Police Regional Office-13 sukad pa niadtong Miyerkules sa Badlis (Ash Wednesday) isip kabahin sa paghatag og seguridad sa tanang katawhan panahon sa pag-obserba sa Semana Santa.

Sa interview sa Bombo Radyo, gipadayag ni P/Sr Supt Nestor Fajura – hepe sa R-3 Division nga gipa-alerto na nila ang tanang police station aron ipatuman na ang ilang mga lakang alang sa malinawon og hapsay nga pag-obserbar sa Seman Santa.

Mas gihatagan nila og pagtagad ang mga lugar nga maoy kasagarang adto-an sa mga tawo niining panahuna sama sa simbahan, mga bus terminals, pantalan og tugpahanan.

Subay sa pag-obserbar sa mahal nga adlaw, nanawagan siya sa tanang katawhan nga magtinabangay aron mapreserbar ang kalinaw.

Nanghinaut usab siya nga mabulukon ang paghandom sa Semana Santa og makahinulsol kita sa atong mga sala ilabina ang mga rebeldeng NPA sa ingon dili na muhimo pagpangatake nga makadaut sa kaayuhan sa katawhan. (James Barcelona, Lantawan)

Share: