PDCC sa Surigao Norte mihimo ug lakang sa pagpanalipud sa mikaylap nga kaso sa AH1N1 virus

Tungod sa nahitabo nga paspas nga pagkuyanap sa virus nga AH1N1 sa tibuok kalibutan, si Gov. Robert Ace Barbers mihimo ug lakang pinaagi sa Provincial Disaster Coordinating Council aron nga mapanalipdan ang katawhan sa mao nga sakit.

Niadtong Mayo 15, 2009, ang maong konseho mihimo dayon sa usa ka Task Force diin miduso kini sa ilang Action Plan on Prevention of A(H1N1). Ang ilang mga nakauyunan nga mga paagi mao ang pagdugang ug hatag ug impormasyon o IEC (Information Education Campaign) sa mga katawhan kalabot na sa maong flu virus, ang pag-establisar sa kiosks area nga wala malakip sa syudad sama sa Alegria, Placer, Claver, Del Carmen-Sayak Airport ug Dapa Port, San Benito ug Sta. Monica diin, adto morehistro ug pagcheck-up ang mga nagbyahe nga mga balikbayans ug uban pang mga langyaw. Ang PDCC mopalit usab sa mga ekwipo ug mga gamit nga kinahanglanon sa mga health personnel, pagpangandam sa mga transportasyon ug komunikasyon, ug ang pagmonitor ug pag-evaluate sa mao nga kalihukan. Moabot sa 1M pesos ang budget nga ilang naaprubahan alang sa tanang mga galastuhan sa nahisgutang Action Plan on Prevention of AH1N1.

Dako ang pasalamat sa PDCC Action Officer, Mr. Adolfo Pantilo, Sr. sa gipakita nga suporta ug kooperasyon sa tanang mga nahilambigit nga mga nagkadaiyang mga ahensya sa gobyerno, alang na sa pagpanalipod sa mga katawhan sa tibuok probinsya batok sa pandemic nga AH1N1 virus. (PGO -Surigao del Norte Media Bureau)

Share: