Siargao Manpower Training and Development Center tukoron karong tuig 2009

Ang Siargao Manpower Training ug Development Center sa Siargao ug Bucas Grande sa dili madugay tukuron na sa dili pa matapos ang tuig 2009. Sa pamahayag nga giluwatan ni Kongresista Lalo Matugas iyang gikalipay pagpahibalo nga iya na nadawat ang SARO numero gikan kang Senate President Juan Ponce Enrile sa kantidad nga 5 milyones ka pesos para sa maong building. Ang Siargao Manpower Training ug Development Center anha ipabarog sa yuta nga gi-donar sa pamilya Matugas sa tuyo nga makatabang sa mga kabus ug makugihon nga mga bata nga gusto mopahimulos sa mga programa sa TESDA.

Ang kinatibuk-an nga kantidad sa maong building mokabat ug napulo ka milyones ka pesos (10,000,000.00) nga dunay saad gikan kang Senate President Juan Ponce Enrile 5 milyones ka pesos, Senador Meriam Santiago 4 milyon ka pesos gikan sa iyang PDAF. Ang pagpa-barog sa maong building mag-abli sa dako nga kahigayonan sa kabatan-onan sa Siargao ug Bucas Grande sa natad sa pang-trabaho sa nasud ug sa gawas gumikan sa mga kurso nga ilang makuha gikan sa TESDA.

Si Kongresista Lalo Matugas sa dihang Gobernador pa sa lalawigan sa Surigao del Norte maoy unang Gobernador nga nakapabarog sa Provincial Manpower and Training Center sa Caraga Region nga karon napahimuslan na nan mga Surigaonon. Ang Siargao Manpower Training ug Development Center gikan sa pondo nga gipangayo ni Kongresista Lalo Matugas sa iyang mga kaila nga Senador ug walay usa ka kusing nga Loan sa maong proyekto. (Ed Mapayo, Surigao Balita)

Share: