Gov. Ace Barbers mihatag ug dakong suporta sa tanang programa alang sa pagpalambo sa natad sa agrikultura

Sa kanunay'ng tinguha sa kasamtangang pangagamhanan sa probinsya sa Surigao del Norte ubos na sa pagpangulo ni Gov. Robert Ace Barbers nga matabangan ang tanang mag-uuma sa probinsya, mipasalig ang gobernador sa paghatag sa iyang hugot nga suporta sa mga programa nga makapalambo sa natad sa agrikultura pinaagi sa pagpahigayon sa 2009 Joint Provincial Agricultural Fishery Council-Rural Based Organization Farm Family Forum niadtong miaging semana, didto na sa Provincial Convention Center ning atong dakbayan.

Ang maong Farm Family Forum nga gipanguluhan sa Provincial Agriculture ug Provincial Veterinary Office ug may tema nga "Rural Based Organization's Affirming Commitment to Sustainable Development," gitambungan sa nagkadaiyang local government units, mga nagkalain-laing tulunghaan sa lalawigan ug mga agricultural ug fisheries associations sama sa PAFC, FA, RIC ug 4-H.

Sa samang higayon, gihimo usab ang ubay-ubay nga mga kompetisyon sama sa Vegetable Based Salad Contest, Rice Based Identification Technology, Poster Making Contest, Table Skirting Contest, Quiz Bee, Agri-Fishery PINAKA Contest nga mipili sa pinakadako nga papaya, alimango ug isda sa probinsya, Extemporaneous Speaking Contest, Singing Solo Contest ug ang haylayt sa maong kalihukan mao ang pagpasidungog sa mga Provincial Gawad Saka Outstanding Winners nga mao sila:

1. Mr. Gerry R. Moreno nga naggikan sa Brgy. Dugsangon Bacuag, SDN nga maoy Outstanding Integrated Rice Farmer/Regional Gawad Saka Outstanding Winner (Outstanding Integrated Rice Farmer).
2. Mr. & Mrs. Rene T. Cabajes nga taga Himamaug sa Lungsod sa Taganaan, SDN nga maoy Outstanding Farmer/Fisherfolk Family.
3. Engr. Pontius Q. Gogo nga lumulupyo sa San Pedro, Alegria, SDN nga maoy nahimo nga Outstanding Agricultural Entrepreneur.

Mapasalamaton ug malaumon si Gov. Ace Barbers nga magpadayon unta ang kadasig ug ang kooperasyon nga gipakita sa tanang mga mag-uuma agig pagsuporta sa tanang mga kalihukan nga makahatag ug dakong tabang diha kanila. Dugang pa niini, iyang gibutyag nga siya nanghinaut nga ang mga bag-ong Provincial Gawad Saka Outstanding Winners ug ang mga migawas nga mga manana-og sa matag kompetisyon, mamahimong maayung ehemplo ug inspirasyon diha sa tanan aron nga makab-ot gayud sa katawhang Surigaonon ang tiunay nga kalamboan dili lamang sa tagsa-tagsa nila ka panginabuhi-an kung dili pati na sa tibuok katilingban. (PGO-Surigao del Norte Media Bureau)

Share: