Program Implementation Review gipahigayon sa Surigao Norte

Tungod sa tumong ug tinguha ni Gov. Ace Barbers nga mapanalipdan ang katawhang Surigaonon batok na sa mga nagkalain-laing sakit nga mitumaw sa katilingban labi na kining gitawag nga lifestyle related diseases, ang Provincial Health Office mipahigayon sa ilang Program Implementation Review niadtong adlaw nga Huwebes, Hulyo 9, 2009 didto sa Provincial Convention Center ning atong dakbayan.

Sa nahibaw-an ang mga nag-unang hinungdan sa kamatayon sa pipila nato ka mga igsuon dinhi sa probinsya mao kining mga sakit nga nakuha gikan sa mga naandang mga bisyo sama sa pagpanigarilyo ug sobra nga paggamit sa ilimnong makahubog. Tungod niini, ang probinsya pinaagi sa PHO ubos sa pagpangulo ni Dr. Audie Relliquette mihimo ug usa ka tigum aron na sa pagreview sa mga public health programs sa matag munisipyo kung kini hugtanon bang gipatuman sa nagkadaiyang lungsod kay tungod ang maong mga programa nakahatag man ug dakong tabang aron sa pagpakgang sa maong mga sakit.

Tumong usab sa maong kalihukan ang paghatag ug mga technical assistance sa tanang mga mas nanginahanglang lungsod, pagpaambit sa mga maayo ug epektibong stratehiya sa mga nagkadaiyang high-performing LGU ug pati na usab ang paghimo sa uban pang inisyatibo nga makapalambo sa natad sa paghatag ug de kalidad nga serbisyo sa tanan katawhan.

Ang maong tigum gitambungan sa nagkadaiyang Health Offices sa probinsya, mga DOH representatives, municipal health officers, public health nurses, rural sanitation inspectors, non-government organizations ug uban pang mga health personnel dinhi sa atong dakbayan. (PGO-Surigao del Norte Media Bureau)

Share: