Taganito Mining Corp mihatag ug hi-lux cars, mga motor ug 5 milyones sa mga Mamanwa sa Claver

Dako ang pasalamat sa mga Mamanwa sa Brgy. Urbiztundo ug Taganito sa lungsod sa Claver pinaagi sa ilang kapunungang Asosasyon sa Madazaw na Panagkaisa nan mga Tribong Mamanwa sa Taganito ug Urbiztondo o AMPANTRIMTU ngadto sa Taganito Mining Corporation (TMC) diin sa makausa pa sila mipakita na usab sa ilang sinsiridad sa pagtuman sa ilang mga saad ngadto kanila sa dihang miturn-over sila ug 2 ka Toyota Hi-Lux cars, 2 ka single motorcycles, 3 Milyones kapesos ug dugang 2 Milyones usab alang sa ilang socio economic projects sa tibuok IP community sa probinsya niadtong Biyernes, Disyembre 4, 2009 didto sa TMC Tennis Court.

Usa ka mocha-colored Toyota hi-lux ug usa ka TMC 155 single motorocycle ang gidawat sa mga kadagkuan sa mga Mamanwa sa Taganito pinaagi sa ilang lider nga si Datu Renante Buklas. Ug laing usa ka black-colored Toyota hi-lux ug usa ka TMC 155 single motorocycle ang mapasalamatong gidawat usab sa mga kadagkuan sa mga Mamanwa sa Urbiztundo pinaagi kang Datu Alicio Patac.

Daku ang pasalamat sa mga kadagkuan sa AMPANTRIMTU pinaagi ni Datu Reynante Buklas ug Datu Alicio Patac ngadto sa mga opisyales ug kadagkuan sa TMC ug sa ilang holding company nga Nickel Asia Corporation kay sukad na sukad wala sila magdahom nga matuman na gyud ang ilang dugay na nga gihangyo ug gipangandoy, ang makabaton na ug sakyanan aron dili na sila maglisod pa sa ilang transportasyon. Sila mipasalig nga ang maong mga equipo magamit dili lamang sa mga kadagku-an sa maong organisasyon kon dili kini usab mosagop sa mga panginahanglanon sa uban nilang mga igsuong Mamanwa.

Sumala usab sa pamahayag ni TMC Resident Mine Manager Engr. Jose Anievas usa kini sa ilang pamaagi sa pagtuman usab sa ilang mga gisaad kanila ug ilang pag-ila ug pagrespesto sa ancestral domain sa mga Mamanwa sa Claver. Giklaro ni Engr. Anievas nga kining ilang gidawat nga mga sakyanan ug 5 Milyones ka Pesos nga Financial Assistance (gipaagi sa usa ka Managers Check) lahi pa kini sa ilang pagadawaton nga 1% royalty tax gikan sa kumpanya kada tuig.

Samtang ang Presidente ug CEO sa Nickel Asia Corporation nga si Mr. Gerard Brimo diin usa usab kini nga misaksi sa maong okasyon, mipahayag nga usa kini ka makasaysayan nga panghitabo kay sanglit ang TMC pa lamang ang mihimo ug pagdonar sa kini nga mga butang sa usa ka Indigenous Community sa tibuok Pilipinas. Siya malaumon nga unta ang maong mga ekipo mapahimuslan ug maayo diha sa saktong paagi ug unta kini magsilbing inspirasyon sa ubang mga kompanya sa mina diri sa probinsya sa pagtuman usab sa kasabutan nga ilang gilagdaan tali na sa IP community sa ilang lugar.

Uban usab sa misaksi sa maong pag turn-over mao ang kadagkuan sa National Commission on Indigenous Peoples sa probinsya nga gipanguluhan ni Mr. Vicente Baldoza. (PIA-Surigao del Norte)

Share: