180 Nurses kinahanglanon para sa RNHeals Project

180 ka mga nurse ang karon gikinahanglan para sa 2011 RNHeals Project dinhi lamang sa lalawigan sa Surigao del Norte nga pagasugdan sa Pebrero 14, 2011.

Kini ang gitaho ni Mr. Emilio Pantejo, ang Provincial Manpower Training Center Officer (PMTC) sa Provincial Capitol pinaagi sa Memorandum Order nga gipirmahan ni Sec. Rosalinda Dimapilis-Baldoz sa Department of Labor and Employment (DOLE) niadtong Enero 13, 2011.

Kining RNHeals Project nga gitimbiyaan sa DOLE, Department of Health (DOH), DSWD ug kauban usab ang PRC Board of Nursing nag punting sa 10,000 ka mga nurse nga ipakanat sa mga lugar sa Pilipinas nga gitudlo sa buhatan sa Department of Social Welfare and Development (DSWD) ubos sa ilang programang Conditional Cash Transfer (CCT) sulod sa usa ka tuig.

Ang pagpangdawat sa mga aplikante magsugod sa Enero 17, 2011 hantud sa Pebrero 4, 2011 ug ang mga aplikante giawhag sa pagkumpleto sa mga mosunod nga mga rekisitos:

Adunay balido nga lisensya gikan sa PRC; Lumulupyo sa maong CCT nga lugar; Labing mayo kung wala mag praktis sa pag ka-nurse sulod sa miaging tulo ka tuig; Medical Certificate gikan sa hospital sa gobyerno nga nagmatuod nga siya pwede nga magtrabaho; Ug dili dawaton kadtong mga benepisyaryo sa niadtong NARS project ug mga nag-drop out dinhi.

Adunay duha ka proseso sa pag-apply o pag pa-rehistro: pinaagi sa online www.nars.dole.gov.ph diin pagabasahon sa aplikante ang instruction o pahimatngon ug tubagon kini pinaagi sa pag fill-up dayon, I print nga adunay control number. Unya hulaton na lang ang pag-anunsyo sa mga napili nga mga nurse-trainee.

Ang ikaduha nga paagi mao ang manual diin ang aplikante moadto na lang sa Provincial Office sa opisina ni Mr. Pantejo aron tabangan sa ilang pag-apply pinaagi gihapon sa website.

Ang mga lugar nga giila nga DSWD CCT ug ang gikinahanglan gidaghanon nga mga nurse mao ang mosunod: Surigao City – 9; Alegria – 9; Bacuag – 12; Burgos – 9; Claver – 7; Del Carmen – 9; General Luna – 9; Gigaquit – 8; Mainit – 11; Malimono – 9; Pilar – 9; Placer – 10; San Benito – 9; San Francisco – 12; Sta. Monica – 9; Sison – 12; Socorro – 8; Taganaan – 8; Tubod – 11. (PGO-Information Center/PIA-Surigao del Norte)

Share: