Ang maong panagtigum gipanguluhan ni Gobernador Sol Matugas ug kini gitambungan nila Board member Mamerto Galanida, Provincial treasurer Daisy Hubilla, Provincial budget officer Gay Cotiangco, School Divisions Superintendents ug mga miyembro sa Local School Board.
Unang nahisgutan mao ang Education Road Map, nga diin gusto ni Gobernador Matugas nga magtinabangay ang tanan aron makab-ot ang kalampusan sa Education Road Map sa atong probinsya. Nagpasalamat usab ang Gobernador sa kalampusan sa pagbisita ni Secretary of Education Bro. Armin Luistro dinhi sa atong probinsya.
Ikaduhang nahisgutan mao ang Proposed Budget nga gigahin sa atong probinsya para sa Local School Board nga mokabat sa P11 milyones, lakip na dinhi nga hatagan ug prayoridad ang mga flagship project sa local school board nga mao ang K+12, Project Best ug ang Fit for School.
Ang pagbutang sa Kindergarten Classes mao ang unang lakang sa programang K+12 ug gusto sa Gobernador nga mabutangan ang tanan mga barangay ug kindergarten classes.
Nahigustan usab ang mga pamaagi aron mapasabot sa mga katawhan ang programa nga K+12 ug Project Best pinaagi sa pagpanghatag ug mga fliers kabahin niining maong programa sa mga radio, brgy. Assembly ug pag patawag ug Barangay Education Summit.
Katapusang nahisgutan mao ang umaabot nga pag-abli sa klase karon Hunyo 2011, kinahanglan gayod nga pangitaan ug paagi ang mga problema sama sa school buildings ug ang paghan-ay sa mga klase aron mapahiluna usab ang mga klase sa kindergarten.
Matud pa ni Gobernador Sol Matugas nga ang edukasyon ang atong hinagiban aron mahaw-as sa kagutom ug kalisdanan ang atong mga katawhan ilabina dinhi sa atong probinsya sa Surigao del Norte.
ليست هناك تعليقات:
إرسال تعليق