Livelihood program ni Gob. Matugas gikalipay sa DOLE Caraga Region

Gikalipay ni DOLE Assistant Regional Director Teresita Bonghanoy ang mga programa ni Gobernador Sol Matugas sa lalawigan labi na gayud ang mga programa alang sa mga mangingisda ug mga mag-uuma aron sa pag sustenir sa ilang panginabuhian.

Atol sa tigum sa tanang mga mayor sa munisipyo uban si Gobernador Matugas niadtong miaging semana, personal nga gitunol ni Assistant Director Bonghanoy kang Gob. Matugas ang mga tseke alang sa mga lungsod sa Pilar nga kantidad P304,500 para sa konstruksiyon sa Marine Fish Cage, lungsod sa Dapa kantidad P300,000 para sa 20 ka mga Ambulant Vendors ug Informal Workers para sa ilang negosyo sa kariton, ug ang lungsod usab sa San Francisco kantidad P133,963 para sa Balite Fisher Folks Association Deep Sea Project.

Gipasidungan usab atol sa maong tigum ug personal nga gitunol nila Gobernador Sol Matugas ug Assistant Director Banghanoy ang kantidad P20,000 sa Mabua Fish Vendors and Housekeeper, isip pahalipay diin mao na usab kini ang subling napili nga awardee sa DOLE kabalikat Kabuhayan Award ka ikatulong higayon.

Sa maong tigum mihangyo usab si Gobernador Matugas sa buhatan sa DOLE nga kung mahimo ang mga Munisipyo sa Bacuag, Burgos, Alegria, Claver, Sison, Tubod, Gigaquit, Mainit, Malimono ug Socorro matagaan unta ug espesyal nga proyekto sama sa E-Bamboo Culture o kon E-Engineered Bamboo Project. (Surigao del Norte Provincial Information Office)

Share: