 |
| Photo credit: Ed Mapayo |
By Ed Mapayo
ALEGRIA, Surigao del Norte (Nov. 2) - Nagtingkagol karon sa bilanggoan ang usa ka suspek sa pagpamaligya og druga human nadakpan sa kapulisan niadtong Nobyembre 1, 2016 alas 8:10 ang takna sa buntag sa purok 5, Barangay Poblacion lungsod sa Alegria.
Ang suspek nailhan sa pangalan Eric Mones Gipal, 37 anyos,minyo, walay trabaho molupyo sa purok 3 sakop sa naasoyng barangay. Nasikop ang suspek pinasikad sa buy-bust operation ubos sa pagpanguna ni SPO4 Arlan P. Detablan . OIC Chief sa kapulisan sa naasoyng lungsod, nakuha sa posisyon sa suspek ang duha ka gagmayng sachet ang gisuspitsahang shabu ug tulo ka strip foil lakip na usab ang marked money cash 500 pesos.
Sumala pa usa ka pulis ang nagpailang customer ngadto sa maong suspek na mopalit og druga gamit ang marked money human pagpalit gidakop dayon kini sa kapulisan. Ang maong operation gisaksihan nila Barangay Kapitan Alexander Micompal ug Barangay Kagawad Evalinda Leones ug membro sa media nga si Ed Mapayo, human nadakpan ang maong suspek gidala dayon kini sa buhatan sa kapulisan aron pasakahan sa kasong pagsupak sa balaod RA 9165.
Personal nga nakahinabi sa tigbalita ang suspek nga si Eric Mones Gipal, iyang gi-angkon nga nagapamaligya siya og druga sa sekritong paagi aron lang makapalit og bugas, sumala pa sa kapulisan sa maong lungsod ang maong suspek nagsurender na kini pinaagi sa oplan tokhang apan padayon gihapon sa pagpamaligya hinungdan nga wala sila magduha-duha sa pagdakop sa tumong nga malikay ang mga kabataan sa pag-gamit sa ginadiling druga ilabina sa mga estudyante ug labaw sa tanan hugot usab nilang gipatuman ang kampanya kontra sa druga.
No comments:
Post a Comment