Surigaonons gitay-og na usab ug 5.9 magnitude nga linog, usa patay

Photo credit: Nards Go

SURIGAO CITY, Mar. 6 - Nag-panic na usab ang katawhan sa Surigao del Norte human mitay-og na usab ang laing kusog nga linog niadtong Dominggo, alas 8:08 sa buntag.

Base sa datus gikan sa Phivolcs-Surigao, ang 5.9 magnitude nga linog anaa kini sa 8 kilometros sa kasadpan sa San Francisco sakop sa maong probinsiya nga dunay kalawmong 7 kilometros ug Tectonic ang origin. Dugang pa sa Phivolcs usa kini ka aftershock sa Feb. 10, 2017 6.7 magnitude nga linog.

Ang maong pagtay-og nasinati usab sa mga kasikbit nga lugar ug probinsiya.

Base sa datos sa City Disaster Risk Reduction and Management Council, usa matud pa ang namatay tungod sa cardiac arrest, ang biktima naila nga si Socorro Cenes, 65 anyos ang edad nga taga Narciso cor. Lopez Jaena Sts, ning syudad. Treinta syete (37) usab ang gikatahong naangol. Gideklarar usab ni Gob. Sol Matugas nga walay klase sa tanang level sa Surigao City ug uban pang kasikbit nga lugar karong lunes.

Sa kasamtangan padayon pang gisuta ang mga damyos nga hatud sa maong linog ug lauman usab ang mga aftershocks.

Share: